KAMATI YA FEDHA YARIDHISHWA NA MAENDELEO YA MIRADI

Imetumwa: January 18th, 2019

Kamati ya fedha na utawala imeridhishwa na maendeleo ya utekelezaji wa  miradi katika Manispaa ya Lindi. Kamati hiyo ilikuwa katika ziara ya siku mbili ya ukaguzi wa miradi mbalimbali inayotekelezwa katika Manispaa, iliyoanza tarehe 16 na kuisha tarehe 17 january.

Kamati hiyo ikiongozwa na Mstahiki Meya wa Manispaa Mhe. Mohamed Lihumbo, ilitembelea jumla ya miradi 12. Miradi iliyotembelewa ilikuwa ni:

• Ujenzi wa shule ya sekondari Mitwero
• Ujenzi wa matundu ya vyoo shule ya msingi Stadium
• Ujenzi wa shule shikizi ya Lukuti
• Ujenzi wa shule ya sekondari Kitunda
• Ujenzi wa shule ya sekondari Mingoyo
• Ujenzi wa kituo cha Afya Mnazimmoja
• Ujenzi wa kituo cha Afya Kineng’ene
• Ujenzi wa shule shikizi ya Mawasiliano
• Ujenzi wa shule shikizi ya Mayani
• Ujenzi wa machinjio ya kisasa Ngongo
• Ujenzi wa shule ya msingi Mtange
• Mradi wa TASAF wa upandaji korosho

Akizungumza katika ukaguzi huo, Mstahiki Meya alisifu na kupongeza maendeleo na hatua zilizofikiwa na miradi hiyo ambayo inajengwa kwa kushirikiana na wadau mbalimbali ikiwemo Manispaa, nguvu za wananchi pamoja na watu binafsi.

Aidha Mstahiki Meya pamoja na Kamati ilishauri Serikali za mitaa pamoja na wasimamizi wa miradi hiyo waweze kutoa elimu kwa wananchi ili wazidi kujitolea na kuilinda miradi hiyo kwa kuwa ni ya thamani na yenye manufaa kwao.

Pia, watu binafsi wametakiwa kuiga mfano wa Bw. Mohamed Khaki ambaye alikuwa ni mwanafunzi wa shule ya msingi Stadium katika miaka ya sitini. Bw. Khaki ameamua kuisaidia shule yake hiyo ya zamani katika ujenzi wa matundu ishirini na sita ya vyoo pamoja kutoa vifaa vya TEHAMA.

Kamati ya fedha ilikuwa katika ukaguzi wa kawaida wa miradi ambao hufanyika kila robo.