Halmashauri ya Manispaa ya Lindi yafanya kikao cha Robo ya kwanza 2024 cha MTAKUWWA.

Imetumwa: November 19th, 2024

Halmashauri ya Manispaa ya Lindi imefanya kikao cha Robo ya Kwanza cha Mpango Kazi wa Taifa wa Kutokomeza Ukatili Dhidi ya Wanawake na Watoto (MTAKUWWA) kwa mwaka 2024. Kikao hicho kimefanyika leo Novemba 19,2024 kwa kujadili hatua na mikakati ya kutokomeza ukatili katika jamii, na kujizatiti kwa kutekeleza majukumu ya kila mmoja katika kamati hiyo.

Mwenyekiti wa Kamati hiyo, ambaye pia ni Mkurugenzi wa Halmashauri ya Manispaa ya Lindi, Juma Mnwele, aliwashauri wajumbe wa kamati hiyo kuendelea na juhudi zao katika kutokomeza ukatili kwa wanawake na watoto, akisisitiza kuwa nafasi za kila mmoja ni muhimu katika kufanikisha lengo hilo. "Nafasi zetu ni muhimu katika kamati hii katika kuisaidia jamii kuondokana na hali hii na tukishirikiana kwa pamoja tunaweza," alisema Mnwele.

Mchungaji Zakaria Lyakungi alieleza shukrani kwa serikali kwa kutambua umuhimu wa kuhusisha viongozi wa dini katika mapambano dhidi ya ukatili, akibainisha kwamba viongozi wa dini wana mchango mkubwa katika kujenga maadili bora katika jamii, na kwamba maadili mema ni nguzo muhimu ya kupambana na vitendo vya ukatili.

Naye, Hakimu Mfawidhi wa Mahakama ya Mwanzo, Consolata Singano, alikiri kuwepo kwa mashtaka ya ukatili wa kijinsia na dhidi ya wanawake na watoto, na kusema kwamba mahakama inawajibika kutoa haki kwa mujibu wa sheria na miongozo ya Katiba ya Jamhuri ya Muungano wa Tanzania.

MTAKUWWA ni kamati inayojumuisha wataalamu kutoka Halmashauri, ikiongozwa na Mkurugenzi wa Halmashauri, na katibu akiwa ni Afisa Ustawi wa Jamii. Wajumbe wa kamati hii ni pamoja na viongozi wa dini, afisa upelelezi, wazee maarufu, na wataalamu mbalimbali kutoka Halmashauri.

Kamati hii ina jukumu la kuimarisha mikakati ya kupambana na ukatili na kuhamasisha jamii kuondokana na vitendo vya ukatili dhidi ya wanawake na watoto, kwa kushirikiana na wadau mbalimbali katika ngazi ya jamii, serikali, na vyombo vya sheria.