DC MWANZIVA AAGIZA LISHE KUWA AJENDA KATIKA JAMII.

Imetumwa: October 30th, 2024

Mkuu wa Wilaya ya Lindi, Mhe. Victoria Mwanziva, ameiagiza Ofisi ya Mkurugenzi wa Halmashauri ya Manispaa ya Lindi kulipa kipaumbele swala la lishe katika jamii. Agizo hilo lilitolewa leo, Oktoba 30, 2024, katika Viwanja vya Zahanati ya Banduka wakati wa Maadhimisho ya Siku ya Afya na Lishe.

Mhe. Mwanziva alisisitiza umuhimu wa kuwa na bustani ya mbogamboga katika shule mpya zitakazojengwa, ili kuwajengea wanafunzi utamaduni wa lishe bora kwa vitendo. Aliongeza kuwa shughuli hizi zinapaswa kuanzia uzalishaji, uandaaji, na matumizi ya mboga mboga kwa wingi, hivyo kuitengeneza jamii inayojali Afya  bora kupitia lishe bora.

Aidha, alishauri kuwepo kwa kitalu nyumba (greenhouse) katika moja ya shule za Manispaa ya Lindi, kitakachosaidia katika upatikanaji wa lishe bora kwa wanafunzi wote wakati wote wa mwaka.

Mhe. Mwanziva pia alisisitiza umuhimu wa kuingiza ajenda ya lishe katika vikao vya kata ili kufuatilia kwa ukaribu mafanikio na changamoto, kwa lengo la kuikomboa jamii kutoka kwenye madhara ya lishe duni, kama vile magonjwa yasiyoambukizwa kama shinikizo la damu na kisukari.

Kwa upande wake, Afisa Lishe Mkoa wa Lindi, Juliana Chikoti, alisisitiza wazazi kuhakikisha watoto wenye umri chini ya miaka mitano wanapata mlo wenye makundi sita ya vyakula ili kuwalinda na udumavu wa mwili na akili, ambao huathiri uelewa wao darasani.

Kulingana na Afisa Lishe wa Halmashauri ya Manispaa ya Lindi Bakari Abdallah,Halmashauri hiyo inatoa huduma za afya kupitia vituo 58, ikiwemo ushauri wa masuala ya lishe katika jamii.